民團:濟場所欠無障礙設施 身障者出門阻礙濟

佮身心障礙者徛做伙，初七帕運羽毛球國手方振宇、演員李國毅，做陣出席活動，推廣身心障礙者權利。長期幫助身心障礙者的心路基金會指出，身心障礙者出門活動，上捷拄著的問題是欠缺無障礙設施，抑無就是設施頂懸的資訊對一寡仔障礙者來講較僫理解。為著推廣這个議題，基金會舉辦公益健走活動，望社會關注。

帕運羽毛球國手方振宇講:「像健身房，運動中心的健身房，可能愛較濟空間，予較濟身心障礙朋友，會使使用 去運動，空間傷狹in無方便，就會造成in無想欲去。」心路基金會執行長賴炳良講:「包括人行道 公用場所的一寡設施，佇無障礙支持的部份，是真無夠，另一部份，是提供友善態度的部份，逐家對身心障礙朋友，猶是較生份的態度，對in可能較有距離。」

心路基金會指出，健走活動佇前三年因為疫情，無法度舉辦實體活動；仝時間也有真濟關懷服務無法度順利進行，攏是透過網路、電話等等方式維持。紲落來疫情管制開放，in也會按照狀況應變。

心路基金會執行長賴炳良講:「咱猶是採用較嚴格的方式，就是咱一寡仔服務，視訊佮實體做伙來做，因為身心障礙朋友身體，屬於較病弱。」

基金會表示，隨疫情管制措施開放，實體服務也當咧沓沓恢復，未來會以線頂、實體雙管道，來幫助身心障礙者。