鼓勵序大運動 "行路換賞禮"手機遊戲鬥顧健康
發布時間：
更新時間：
國立中正大學，設計一種、老人的運動遊戲，序大去到校園內底，用手機仔掃QR CODE，行路去揣後一个點，行路的時間、行幾步等等的資料會自動傳去線頂紀錄運算，逐個月閣有獎勵，鼓勵老人加出來戶外振動，嘛了解家己的體能狀況。(此新聞標題、前言、內文全臺文)
用手機仔等等的數位設備掃QR Code，根據指示行去到校園內的後一个地點。運動的時間、行幾步等等相關的資料，就會傳去網路頂面做記錄，國立中正大學配合國民健康署的計畫，結合科技佮運動，欲來向嘉義縣來推廣。
中正大學運動競技系主任 李淑芳表示：「掃一下QR Code，然後遮的資訊，咱佇網路雲端就會當看著，伊這个科技的部份，直接幫咱來算行路行幾步，目前的成績，咱逐個月閣會來頒獎鼓勵」
嘉義縣政府表示，目前縣內65歲以上的人口比率是17.26%，2060年按算會達到41%，為著欲推廣老大人的運動風氣，計畫的第一站設佇民雄的中正大學，配合學校的專業智識，提升序大運動的效率。
嘉義縣衛生局長 趙紋華表示：「透過這款結合了後，會當去了解序大個人的運動量，閣有家己體適能的狀況，透過專業的老師，來做個別化的運動設計」
中正大學副校長 郝鳳鳴表示：「阮希望運動了後，身心健康的情況之下，會當有閣較濟的付出，會當老有所用，然後帶動區域的繁榮」
中正大學指出，目前這个示範場域佇中正大學內底，按算欲配合產業、政府佮學校的資源，推廣到嘉義縣18个鄉鎮，希望增加序大出門運動的機會。
