嘉義市的獨立冊店最近以「臺灣文化協會佇嘉義」做主題，規畫閱讀佮城市導覽旅行，行程內底透過臺語導覽，欲予民眾了解在地畫家-陳澄波的作品後壁，想欲表達的意義。
導覽人員羅怡芬講：「請逐家先揣，共這兩幅圖先揣出來，揣出來了後才落去揣字。」
提著題目了後，參加活動的民眾，逐家攏咧揣題目內底的線索。嘉義市的獨立冊店最近以「臺灣文化協會佇嘉義」做主題，規畫閱讀佮城市導覽旅行，活動內底用陳澄波密碼這本冊，佇導覽走讀的活動當中，設計會當拆題目的謎題。
導覽人員羅怡芳講：「有的所在是伊以前蹛的所在，有的所在是伊以前定定去遐畫圖的所在，所以主要是遮佮陳澄波彼个時陣生活的背景有關聯。」
參加民眾陳同學表示：「會當拆題目，閣會當知影閣較濟物件。」
為著欲予民眾了解百年前的臺灣文化協會，是按怎對文學、歷史、文化、社會遮的層面表達in的理想，嘉義的獨立冊店，舉辦台語走讀活動，閣安排謎題予逐家來破解，增加對導覽內容的印象。
參加民眾高小姐講：「有淡薄仔忝，我想講會當輕輕鬆鬆來遮聽導覽，想袂到愛真認真，一直思考來想答案，毋過真好耍。」另外一位參加民眾潘小姐也講：「對陳澄波畫的圖有概念了後，愛阮來揣內底的線索，遐的字內底全部解答出來了後，會當體會著陳澄波這个人的性命精神。」
主辦單位表示，陳澄波是文協時代推動藝術文化的代表人物之一，台語嘛是彼當陣生活的語言，用台語的導覽共歷史佮拆題目敆做伙，毋但保存在地歷史，嘛替學習加添趣味。
