建材起價.疫情欠工 故宮南院國寶館到今才動土
林緯廷 / 嘉義報導
發布時間：
更新時間：
目次
嘉義縣故宮南院原本規畫佇2021年發包、2026欲對外開放的國寶文物修復展示館，因為建材起價，閣拄著疫情欠工等等的原因，工程到今猶未進行。9/22下晡，故宮南院總算是進行動土典禮。
故宮院長佮嘉義縣長做伙動土，嘉義縣故宮南院新館，國寶文物修復展示館的建設工程，總算欲正式開始。工程經費計共32億，按算佇2027年開館。
嘉義縣長 翁章梁表示：「有一館，這馬閣加上二館，文化的能量不斷擴大，我想因為故宮是一个國際性的博物館，所以這款的投資佮建設，會當予世界佮嘉義來做連結」
這个新館未來離大門干焦90公尺，減少過去民眾愛曝日頭行誠久才會當看著展覽的問題，嘛增加新的展覽方式，故宮表示，針對文物的保護，佇建築方面攏有來加強。
故宮院長 吳密察指出：「阮用101大樓彼種規格的工法，其實毋但是地動的威脅，包括水、火、電，阮攏有非常完善的規畫」
2015年正式開放的故宮南院，原本按算欲佇2021年發包起新館，因為國際原物料閣有疫情欠工，流標三改，總算佇22下晡動土。故宮表示，新館完成了後，故宮南院會成做國際級的文化基地。
