霹靂布袋戲創辦人 藝師黃文擇過身.享壽66歲

黃海岱布袋戲家族的成員,也是黃家第四代,霹靂布袋戲的創辦人-黃文擇,昨暝別世,食到66歲。黃文擇是霹靂布袋戲內面4千外个角色的配音員,他特殊的聲線予布袋戲變甲愈好看,這陣過身的消息一傳出來,外界攏誠毋甘。

「半神半聖亦半仙,全儒全道是全賢,腦中真書藏萬卷,掌握文武半邊天。」

霹靂布袋戲經典角色素還真的口白,就是由藝師黃文擇配音。12暗時過身、享壽66歲的黃文擇,是黃家布袋戲家族第四代成員,伊因為聲音多變,霹靂布袋戲30幾年以來,伊配音的角色超過四千个,業界尊稱「八音才子」。

布袋戲藝師,黃文擇捌表示:「霹靂系列內底的角色,全部攏算(配音)啊。包括路人甲、路人乙攏是。」

霹靂布袋戲聲演,蔡易軒表示:「一般人配秦假仙,伊可能就是用一个鼻音,就是講『蔭屍人我共你講,走去佗位』其實文擇大師伊个秦假仙的鼻音,是對鼻空遮直接出來的,所以伊是用按呢『蔭屍人,你這馬走去佗位』。」

比並過去由黃文擇一个人包辦濟濟角色的配音,霹靂這馬已經成立配音的團隊,毋但培養新一代的配音員,嘛是欲揣出一條傳承布袋戲的路。

布袋戲藝師,黃文擇捌表示:「遮的新的優秀的配音員,其實恁看袂著爾,𪜶逐工攏咧練習,當然觀眾有當時仔雄雄,佇接受度難免有一寡,感覺怪怪,其實你愛想講這个物件若欲百年傳承,一直傳落去,猶是需要做一寡改變。」

黃文擇過身的消息傳出,真濟戲迷攏佇霹靂布袋戲的面冊表達毋甘。霹靂國際多媒體表示,因為疫情期間,黃文擇的後事會簡單舉辦,落尾會閣舉辦相關紀念展覽,予各方戲迷追思。

全台敬老金大調查

相關新聞