新竹歷史建築舊內灣派出所 連日大雨.厝頂崩落

新竹縣舊的內灣派出所,是少數保留完整的日本式派出所,2006年登錄做新竹縣歷史建築,毋過最近山區落幾落工的雨,昨昏厝頂煞雄雄崩落來。

已經有80外冬歷史的舊內灣派出所,過去一直有保存修復計畫,按算欲將這棟老建築閣再利用,想袂到連紲幾若工落雨了後,派出所柴箍厝頂袂堪得,崩落來一大塊。

舊內灣派出所工作人員:「連火車頭彼爿攏聽會著,真大聲。(大概是啥物原因)舊,內底有漏水。」

文化局接著通報,派人來現場勘查,另外嘛參工程人員討論,暫時會先搭布帆,嘛會提出災害緊急搶修的計畫。

新竹縣文化局文資科長 張愛倫:「先用布帆崁,來避免閣會沃雨造成閣較嚴重的損失,另外阮嘛會去爭取文化資產局的災害緊急搶修復建。因為遮是歷史建築,所以阮嘛是以恢復原貌為目的。」

舊年文化局已經提案,希望派出所會使揣ROT團隊來經營,這馬因為厝頂結構害去,紲落來恐驚愛先解決修復的問題。

相關新聞

專題|全台敬老金大調查