發表"臺灣自救宣言"被判刑 彭明敏流亡23冬

彭明敏1923年佇台中大甲出世,細漢時就予老爸彭清送去台北讀冊,後來猶捌去日本讀東京帝國大學,但是1945年拄著長崎空襲,自按呢轉來台灣讀冊,1948年台灣大學政治系畢業,閣去加拿大佮法國提著碩士佮博士學位,轉來台灣了後佇台灣大學政治系做系主任,猶閣予蔣介石點名派做駐聯合國的代表團顧問,一切看起來誠順勢,煞因為一篇自救宣言,流亡海外二十外冬


史學學者 李筱峰(2020.11.26) :「咱知影台灣人民自救宣言,發表佇1964年,國民黨政府猶袂退出聯合國,伊已經看出來,你已經是一个流亡政權,伊就講咱愛制定新的憲法,建立新的國家」。

制定新憲法、建立新國家、加入聯合國是彭敏明先生五十八年前的主張,也因為這十五個字,彭明敏予政府判八年有期徒刑,1965年才特赦出獄,毋過受著監視失去自由,1970年伊改變面貌流亡去瑞典佮美國,猶原為著台灣民主自由四界走傱

彭明敏(1975年台灣人民紐約大遊行) :「佇世界各地的台灣,攏佇紐約同齊替台灣發聲,為著台灣島嶼濟濟愛國的人民來發聲」。

1992年彭明敏結束了23冬流亡生活,轉來台灣,1995年加入民進黨,參選台灣頭一屆民選總統,雖罔無選牢 猶毋過彭明敏繼續佇政壇拍拚

彭明敏文教基金會辦公室主任 李俊達:「伊生前最後一篇文章內底,真歡喜看著講佇舊年東京奧運的時陣,一个台灣一个中國這个代誌,已經佇世人的眼中來呈現,這是伊上重要的一句話,伊嘛會當看著伊來實現,所以我想,伊是無遺憾的離開這个世間」。

彭明敏基金會表示,彭敏明先生佇四月初八透早五點五十五分,真安詳離開人世間,交代一切簡單處理,火化了後會送轉去高雄鹽埕埔的墓園,真安慰台灣有今仔日的民主自由,後壁的民主路相信台灣人會繼續行落去

彭明敏(2020.11.26):「台灣這个民主,猶未完全民主,這个民主的一直改革,一直進步才會使得」。

 

相關新聞

專題|全台敬老金大調查