六福村麒麟鹿10冬內死8隻 民團反對閣再引進

將樹枝囥佇麒麟鹿「布丁妹」的遺像頭前追思。新竹六福村園區內的麒麟鹿布丁妹,今年正月著病過身,干焦活15歲。動物保護團體指控六福村管理失當,十冬內有八隻麒麟鹿予飼甲死去,大部份攏活無十歲。

鳥語獸躍調查員 林婷憶:「布丁妹佮其他的麒麟鹿,其實攏一直有捻轉胃蟲症,這種寄生蟲長期礙著麒麟鹿的健康,致使in愛一直吃各種抗生素,驅蟲藥來治療,麒麟鹿壽命若活無十歲就死亡,就算真短命,閣再講麒麟鹿平均壽命會使到廿七歲」。


動保團體表示,園區內底真濟所在傷狹,環境閣䆀,無法度滿足濟濟動物的需求;而且閣有予遊客付錢飼動物的體驗活動,違反動物癖性。舊年六福村閣再提出引進三隻麒麟鹿的申請,動保團體這馬要求政府駁回,嘛要求檢討引進動物的流程。

農委會畜牧處動保科科長 鄭祝菁:「新竹縣政府有啟動,動物展演現場營運計畫的審查,因為會牽涉著養飼場所,敢有適合引進新的動物,嘛有做現場的會勘,包括動物運輸,嘛要求業者提出完整的運輸計畫」。


針對指控,六福村無提出回應。動保團體批評,因為惡質的居住環境,真濟動物已經出現異常的行為,但是六福村閣佇有限的空間之下,繼續引進、生湠動物,致使環境愈來愈䆀,若是無改善就引進,會造成閣較濟的悲劇。



 

相關新聞

專題|全台敬老金大調查