高端巴拉圭第3期解盲成功 提著當地緊急授權

高端佇咧2/14公佈巴拉圭第三期臨床試驗結果,證明高端疫苗的安全性有夠,中和抗體效價是AZ疫苗的3.7倍。2/14已經提著巴拉圭政府的緊急使用授權EUA。咱台灣的指揮官陳時中表示,目前全世界有8个國家承認高端,咱國內已經注100外萬筒,賰的300萬筒,除了國內會繼續使用,也會規劃做人道救援。

高端這個月14公佈佇巴拉圭進行的第3期臨床試驗,結果顯示,疫苗安全性良好,通過試驗設定的優越性標準,而且中和抗體效價達到對照組AZ疫苗的3.7倍,正式提著巴拉圭的緊急授權EUA。

高端副董事長暨總經理 陳燦堅表示,「上重要的是愛加速這个國際認證,確認咱這个疫苗會當予國際接受,紲落去閣較重要的是這个WHO的實驗愛有成,所以一旦有結果的時陣,咱高端疫苗已經有準備好,會當提供閣較濟遮好的疫苗予閣較濟人會當用。」

高端副董事長表示希望對國產疫苗升格做國際疫苗,上緊三月底WHO團結試驗結果出來,若通過,就會當向各國提出EUA申請,這消息也予高端股票佇15,起懸盤,股價來到265箍,目前已經承認高端疫苗的國家有8个。

中央流行疫情指揮中心指揮官 陳時中表示,「有承認阮高端的有印尼、帛琉、紐西蘭、貝里斯、索馬利蘭、泰國、愛沙尼亞、巴拉圭,計共是八國。實驗的結果摻佇台灣實驗的結果其實是真相siāng,未來我相信伊猶是會得著閣較濟國家的認同。」

目前國內注超過192萬外筒高端疫苗,陳時中表示進前和高端公司買500萬筒,這陣扣掉注完的,政府手頭猶有300萬筒,伊講除了繼續提供國內使用,也會規劃用佇人道救援。

相關新聞

專題|全台敬老金大調查