新竹市招300間愛心店家 發餐券予弱勢好過年

後禮拜就欲過年矣,新竹市三百外間愛心店家,做伙參與「呷熊飽」補助計畫,希望予弱勢民眾佇過年過節也當感受著眾人的溫暖。

已經滷八點鐘的滷肉,予人看了會流嘴瀾。咧欲過年矣,厝內經濟較困難的家庭,過年可能更加辛苦,新竹市政府佮三百外間商家合作,提供愛心餐券,希望in過年的時陣免驚會枵腹肚。

愛心餐老闆鄭明枝:「只要來講需要愛心餐,阮袂去問為啥物需要,抑是需要啥物證明。只要人來阮就提供。這是阮有法度做的,無講食誠好,毋過一定食會飽。」

愛心餐老闆娘周沛汝:「弱勢家庭真正非常需要。莫看這一細碗飯,對in來講是誠溫暖。」

社會處指出,這份「呷熊飽」餐食,主要是提供弱勢家庭有需求的時陣,經過社工評估就會提著餐券,會使到有貼愛心商店的店頭換食的物件。

新竹市社會處長張柔:「這改過年較長有九工,嘛因為疫情關係,有一部份家庭無方便外食,嘛因為假期時間長,所以阮透過愛心福利社佮呷熊飽計畫,予弱勢家庭佇過年的時陣,囡仔大人攏會當食飽,感覺著溫暖。」

今年因為疫情衝擊,真濟人頭路受影響,頭家講雖然真濟原料直直起價,毋過只要想著會使幫助人,閣較辛苦嘛有價值。

全台敬老金大調查

相關新聞