內灣老街列確診行蹤緊消毒 店家煩惱過年生理

商圈人員一間一間發單仔，提醒店頭家注意防疫，新竹縣內灣老街傳出有確診者，20當工來遮𨑨迌，雖然講干焦停留一點鐘，而且全程攏有掛喙罨，毋過商家嘛是煩惱加減會影響生理。

內灣商家表示：「影響誠大，自頂禮拜開始講桃園有幾例確診了後，阮內灣彼兩禮拜，假日完全人就變誠少矣。」

遊客表示：「喙罨掛好，然後隨身會紮酒精，物件買完攏會消毒，嘛袂使那行那食物件。」

衛生局受著通報，透早趕緊派人來現場消毒，商圈嘛加強防疫措施，除了要求商家做好實名制，過年閣愛佇主要的出入口設防疫工作站。

內灣形象商圈總幹事，古玉華表示：「透早已經有做過老街的全面消毒，每一間店頭嘛做宣導，閣有請逐家掛好喙罨，做好防疫措施，佇二月初四進前這段期間，若是有任何無爽快，就敲電話去病院做篩檢。」

閣過幾工就欲過年矣，面對疫情逐家攏毋敢靠勢，趕緊做好消毒，嘛呼籲民眾出門一定著掛喙罨，做好防疫措施。