拚設臺灣文學園區 委員會設佇麻豆糖廠今揭牌

佇臺南的「臺灣文學國家園區」,佇今仔日總算共推動委員會的辦公室掛牌起去囉。文化部的官員也講,這个園區是欲來突顯臺灣文學猶是有其他的方向,就愛逐家來討論。

臺灣文學國家園區推動委員會正式揭牌,資深的台灣學研究學者張良澤,歡喜比喻講,媽媽總算有身矣,台南市政府也規劃出一个場地。

臺灣文學國家園區的預定空間,就選佇總爺藝文中心對面的,台糖廢倉庫,未來可望成為推展文學的所在。」

遮的倉庫、土地超過7公頃。張良澤表示,過去𪜶這代攏慣勢用手寫,真濟手稿、作品的保存,攏予逐家頭疼,園區的建立毋但予遮的文物有安身之處,也通予民眾有一个行踏的所在,認捌台灣文學。

臺文學者,張良澤表示:「遮的學者已經老矣,這馬若過身了後,遮的囝孫就共伊擲掉,然後提去秤斤賣掉,這對一个作家抑是愛冊的人,這是真慼心的代誌,有一个所在通好囥,按呢的時陣,逐家攏真願意。」

文化部政務次長,李靜慧表示:「按怎共臺灣文學保存、推廣,甚至是延續,這件代誌是文化部參臺灣文學館,會閣再努力,毋過是毋是用一个園區的方式,來彰顯臺灣文學,這層代誌就是閣愛看逐家的討論。」

臺南市文化局表示,這馬初步規劃,推動委員會成立了後,就馬上會開始討論,張良澤認為,無論按怎,已經是行出一大步,台南除了台積電,也期待台灣文學成做另外一支翼股。

相關新聞

專題|全台敬老金大調查