5月本土疫情損蕩萬華 臺北辦展覽說防疫心路

今年五月新冠肺炎疫情爆發佇萬華,彼陣的剝皮寮歷史街區短時間內成立快速篩檢站,足濟民眾攏真有印象,台北市文化局最近佇遮展出《36工快篩防疫堡壘展》,回顧彼當陣防疫工作的辛苦。

保留排隊動線,呈現半冬前疫情爆發的場景,剝皮寮歷史街區除了是古蹟,也成做防疫歷史的重要見證。

台北市文化基金會總監 葉益青:「所以伊也是台灣第一个,醫療院所以外的快速篩檢站,伊當時是足有成效的,予附近的民眾,就算你是行出門,你只要行幾步仔路,你就通到一个篩檢站,所以伊真有效果,去鼓勵在地的民眾直接入來篩檢」。


葉益青表示,彼陣選剝皮寮做篩檢據點,事後證明這个決定正確,也因為建築的特色,成為做便的隔離空間。


台北市文化基金會總監 葉益青:「特別的街區特色,也拄好變成防疫快速篩檢站,真好使用的一个,完全是開放式,但是閣會使封閉的空間」。

台北市文化局最近佇遮展出《36工快篩、防疫堡壘展》,展出彼當陣醫護人員佇熱人的天氣所穿的防護衫、篩檢家私、閣有逐工的篩檢日誌等等。真濟民眾來到遮攏足感動,因為這个所在見證規个艋舺面對疫情,逐家做伙團結面對,除了醫護人員的奉獻、艋舺居民也是重要的跤手。


 

相關新聞

專題|全台敬老金大調查