鄒族"巫師文化"強欲消失 嘉義社區辦活動助傳承

阿里山的鄒族原住民,過去佇一寡仔祭典當中,攏會有巫師(yoifo)共同參與,祈求活動順利。猶毋過有社區發見,近年巫師(yoifo)是愈來愈罕得看,阿里山的山美社區毋但舉辦工作坊,閣佇嘉義縣的社區營造成果展來展出,希望民眾會當認捌巫師(yoifo)文化對鄒族的重要性。

台頂是在地表演團體的演出,台跤閣有社區序大等待欲上台表演,來自25个社區、團體、學校佮鄉鎮市公所,做伙佇嘉義縣社區營造聯合成果展當中,互相交流分享努力的成果。

大埔鄉和平社區發展協會理事長,吳倚豪表示:「來到遮去看別人的,一寡其他社區的社造精神,然後看覓有啥物所在,值得阮紮轉去大埔,閣予阮繼續進步的一个能量。」

新港文教基金會執行長,徐家瑋表示:「這部份其實展現誠濟,嘉義無仝款的特色佮文化,共在地的文化轉變做𪜶社區的故事。」

來自阿里山的山美社區,嘛佇這改成果展覽當中,向逐家紹介𪜶當咧復興的巫師文化。社區表示,部落過去因為攏無相關的記錄,所以今年頭一擺用工作坊的方式,共巫師文化內底的生活智識,紹介予社區的少年人認捌。

阿里山鄉山美社區發展協會專案經理,方敏全表示:「巫師文化珍貴的所在,就是到今,伊對鄒族的一寡自然的態度,自然觀、宇宙觀,或者是對阮的靈魂觀來講,其實巫師文化會當解說甲非常清楚。」

為著保存巫師文化,發展協會嘛申請欲登錄做鄒族的無形文化資產,嘉義縣文觀局已經通過審查。社區指出,希望除了原住民的語言佮祭典文化,這項對原住民生活精神有誠大影響的巫師文化,會當沓沓仔得著重視。

相關新聞