嘉義公園內底有一塊乾隆皇帝親手寫的石碑，頂頭記錄林爽文事件，嘉義民眾守城有功。市政府這陣邀請雲科大的文資保存團隊，用科技監測來保護這項重要的歷史文物。
雲林科技大學的教授佮嘉義市政府建設處人員，徛佇這塊「福康安等功臣生祠石碑」頭前，討論設佇頂面的科技設備，會當按怎保護這項重要文物。
雲科大智慧辨識產業中心主任張傳育：「這項監控系統，伊其實是整合廿外種功能的感測器，所以伊嘛是第一套用佇室外的監測系統。」
佇嘉義公園內底，除了清朝福康安的石碑，閣有其他的文物，但是因為攏囥佇室外，受天氣環境影響，可能會造成損害。研究團隊表示，除了監測環境，嘛愛思考透過一寡施設來保護文物。
嘉義市建設處副處長羅資政：「包括阮有丙午震災紀念碑，閣有一江山紀念碑等等遮的文物。我想阮會陸續做一寡規畫，當然如果有必要的時陣，阮會閣請遮个專家學者來協助阮，看按怎處理紲落來的維護工作。」
雲科大文化資產維護系教授曾永寬：「親像是一个碑亭的設施，然後共我拄才講的日頭、雨風，儘量共遮的物件影響降低，予IN的環境儘量保持穩定。」
雲林科技大學的團隊表示，這套設備的技術，結合文資修復佮電子資訊工程等等，四个科系的資源來完成，希望透過AI技術監測文物，降低文物受著損害的程度。