新竹水坑溪魚反肚 掠著工廠鹽酸管破去.汙染溪水

溪水內的魚仔已經反肚，現場閣鼻著酸臭味，環保局接著通報派人到現場檢測，發現水的PH質干焦賰1.37，追查發現是附近一間工廠的鹽酸管破去所引起。

科技公司協理徐義陽：「施工人員無細膩造成管線冗去，閣加上前一站仔地動影響，致使管線破去才造成鹽酸外流。」

環保局水汙染防治科長陳昌揚：「發現是工廠內鹽酸桶仔管線破去造成外流，會共罰6萬箍以上、2000萬以下罰款。」

在地鄉親不滿溪水受著汙染，來到工廠門口抗議，要求廠商負責，而且連鞭停工。
 

新竹縣議員陳新源：「85年到今檢舉的事件，無包括無檢舉的就有廿幾擺，這是真嚴重的。表示這間公司根本無共法規看佇眼內。」

落尾經過協調，工廠除了愛完成水質檢測，紲落來嘛需要擔起溪水復育經費，才結束抗議事件。