飯店宴會餐廳改注射站 交通利便望拚注射率

第12輪公費疫苗今仔日開始注,高雄今增加新的注射站,是一間專門辦桌的飯店,因為這批提供3種疫苗,人數濟,所以市府才安排交通利便的飯店做注射站。



佇大廳有人指引上三樓,毋知的人叫是遮濟人欲來飯店用餐,其實民眾是來遮注預防射。

三樓的宴會廳全部拍通成做大型注射站,佇裝潢豪華的高級飯店內底,民眾分區等待、注射佮歇睏,有人講按呢心情較輕鬆。

民眾:「有淡薄仔親像入來食飯,安排佇遮,氣氛較好勢一寡,袂遐爾緊張。」。

民眾:「真好勢,逐家攏真專業,我感覺非常好。」。

第12輪公費疫苗攏總有三種,這个新的注射站逐工注無仝的疫苗,目前一工預約三千外人,按算三工會當提供一萬人服務,來注預防射的民眾有專門的通道,絕對袂人kheh人。

業者陳維倫表示,注射的民眾佮用餐的民眾,是有分流的處理,而且注射站佇阮的三樓規層樓,佮其他層用餐的民眾完全隔開,而且逐工注射了,規个場所攏會大清消。

衛生局表示,這擺12輪第一階段注射人數有35萬六千人,人數真濟,才會佇北高雄捷運站邊仔,增加注射站,攏總規劃一千六百外的場所,希望提懸高雄的注射率。


 

全台敬老金大調查

相關新聞