往過臺中予人叫做文化城，對日本時期開始，就有濟濟戲院。毋過社會發展，連鎖電影院興起來，這寡老臺中人的娛樂場所也漸漸消失。國美館和地方文史團體，最近就有辦一个行踏的活動，𤆬民眾對臺中後火車頭出發，用臺語紹介臺中電影產業的起起落落。
臺中文史復興組合創辦人，格魯克表示：「咱這馬看著的戲院，是戰後才開始經營的豐中戲院，但是佇日本時代，這个建築物就佇咧矣。」
台中地方文史團體佇台中後火車頭成功路這搭，用台語替逐家紹介這間捌經營一甲子的豐中戲院，1953年以前，遮是台灣歌劇戲院，專門搬歌仔戲，1953年以後改建做豐中戲院，主要放西洋片，2004年連鎖的大型電影院開始興，就按呢收起來。
走讀民眾表示：「南台、南華、豐中、台中戲院，攏是阮談戀愛的時陣，約會的所在。」
臺中文史復興組合創辦人，格魯克表示：「這是咱生活的一部份，但是足濟戲院，其實隨都市的發展了後，沓沓仔就收起來，就無去矣。」
講起往過台中人的休閒娛樂，這間佇南華戲院邊仔的羅氏廣告社，畫過濟濟出名的電影看板，16歲就咧學畫看板的羅師傅講這齣台語電影「大俠梅花鹿」就是伊畫三點鐘的作品。
羅氏廣告社師傅，羅錫源表示：「可惜就是講，這馬無彼此彼个樣品，予恁欣賞，予人的予人，用掉的用掉。」
眾人行到佇綠空鐵道頂，也閣發現李行導演拍養鴨人家的電影場景。
國美館圖書資料組專員，任台勝表示：「台中以早有所謂的文化城，像較早有一寡中央冊局、文協，也透過文協這所在，也閣有一寡藝術，彼个時陣的映畫，就是這馬的電影方面來發展。」
國美館和台中地方文史團體對台中電影發展史出發，𤆬民眾對後火車頭用母語了解，往過予人叫做文化城的台中，到今猶真有故事、真迷人。