資深演員龍劭華過身 檢方驗屍確定破病造成

透早龍劭華的後生佮查某囝，tshuā in阿母，做伙來到殯儀館，龍劭華in某傷過傷心，一直予後生扶咧，實在是人雄雄離開，家屬袂當接受，毋過相驗了後，檢察官已經確定龍劭華的死因。

高雄地檢署檢察官李明蓉表示：「認定死者是因為病症的原因死亡，家屬對這个表示攏無意見，已經發相驗屍體證明書予家屬，來處理後事」

確定龍劭華是病症致使過身，紲落來家屬就趕緊欲共伊的遺體請轉去台北。

龍劭華這站仔是佇高雄拍戲，13彼工伊人坐佇拍戲現場的布棚內底歇睏、啉茶、開講，看起來真正常，想袂到14暗時雄雄予人發現，伊倒佇八十五樓套房內底，送醫不治，享年68歲。高雄市政府表示，龍劭華定定來高雄拍戲，私底下對人真親切，市府會全力協助家屬。

高雄市文化局副局長簡美珍講：「龍哥雄雄過身阮真毋甘，文化局這馬繼續佮劇組，保持上密切的連絡，希望會當予家屬上大的關懷佮協助」

聽著龍劭華雄雄過身的消息，親友攏毋甘，伊的經紀人無出面，干焦佇面冊發文，講予人淡薄仔安慰的是，龍劭華是坐佇膨椅安詳離開，{{片花 IN}}知影伊離開的時無痛苦，希望伊永遠安息。