金鐘56 "無事坐巴士"."話山話水"澎恰恰入圍

第56屆電視金鐘獎,今仔日公布入圍名單,公視台語台的「無事坐巴士」連紲兩年入圍「最佳生活風格節目獎」,另外一个是「話山話水話玲瓏」的主持人澎恰恰,也入圍「最佳綜藝節目主持人獎」。

𤆬民眾坐巴士,行遍台灣大街小巷,認捌地方風俗民情,公視台語台的無事坐巴士,連紲二冬入圍金鐘獎,製作人希望用鏡頭翕出台灣豐富多元的族群文化。

無事坐巴士製作人,杜立仁表示:「尤其台灣有足濟族群,有客家有原住民,所以阮做節目無限制干焦台語的族群爾爾。阮希望嘛會當介紹各種的文化,嘛感謝生活佇這片土地所有的人,阮節目才有機會通好入圍。」

無事坐巴士主持人,許琡婷表示:「因為巴士就是會用深入台灣,大大細細無仝的鄉鎮,一寡庄仔頭,咱會用得看著遮的拍拚的台灣人,攏咧無閒啥?攏咧拍拚啥?」

用趣味方式推廣台語文化的話山話水話玲瓏,也入圍最佳綜藝節目主持人獎。

臺語台台長,呂東熹表示:「臺語台足濟節目攏袂䆀,包括青春咱的夢,包括咱的節目攏真濟,攏會當提供予觀眾來欣賞。」

呂東熹表示,金鐘獎競爭激烈,雖然今年入圍名單比舊年少,但是大家會繼續拍拚做節目,希望並目前閣較進步。

全台敬老金大調查

相關新聞