英國"愛丁堡藝穗節"起鼓 招咱演唱恆春民謠
發布時間：
更新時間：
今年英國的愛丁堡藝穗節對這個月開始，屏東恆春民謠受邀請，欲佇線頂演出兩場，由人間國寶-陳英和眾人做伙演出。毋但有92歲的阿媽，嘛有幼兒園的囡仔做伙唱。in欲共恆春民謠唱予全世界的人聽。
大人囡仔徛佇古城前，唱出恆春民謠，民謠的歌聲，佇果子園，佇檳榔擔攏會當聽著，恆春民謠今年受英國愛丁堡藝穗節邀請，欲佇線頂演出，雖然拄著台灣疫情期間，為著表演，不管是92歲阿媽，抑是6歲囡仔，攏轉來練唱。
傳藝師黃淑瑛講：「已經關一兩個月去，所以今仔欲出來唱的時陣，聲音攏㧎㧎。毋過阮若練幾遍過阮就攏恢復矣」
因為疫情，團員是分批、分流練唱，演出思想枝、四季春等等歌曲，歌詞毋但有英文翻譯，嘛有白話字，而且嘛共恆春的風景佮生活攏結合佇民謠內底。
導演王煌鵬表示：「咱遮恆春遮的在地、遮序大in的性命故事，就是上好的劇本。所以用in平常時in的生活按怎唱歌，有當時有的阿媽可能包檳榔時就想欲唱歌」
恆春民謠捌去美國、日本演出，今年第一擺去英國，雖然14佮21兩場是線頂表演，阿媽佮囡仔攏足歡喜，嘛希望疫情過去若有機會，會當去英國唱予全世界的人聽。
