三級警戒降二級 桌仔耍猶只准販賣.禁店內弈

這馬二級防疫,親像游泳池、掠龍等等行業,已經是帶條件開放;毋過有一種店是予人客來奕桌仔耍,到今煞攏無法度開放。業者家己提出防疫規範,希望政府聽著心聲,允准恢復營業。

拭去桌頂的坱埃,櫃仔內的桌仔耍排好勢,看會出業者真久沒整理,雖然政府開放予IN賣產品,但因為防疫猶未允准予人客佇內底耍,對IN來講原本9成的收入就來自店內的消費,這馬看著座位空空顛倒心酸。

桌仔耍業者成寧表示:「降二級的時陣,阮單獨予人搝出來;阮佇各方面的防疫佮研議,譬如講面罩、喙罨,甚至紫外線的消毒,阮攏已經做著。我感覺阮安全性超過掠龍,也超過游泳池。」

桌仔耍業者不滿,喙罨遛落來的會使開業,毋知IN是佗位較危險。而且進前的二級防疫,IN就照常營業,這馬煞袂使,標準是啥?另外仝款較新潮的室內遊戲劇本殺,業者也做陣喝聲,希望政府予IN一條生路。

劇本殺業者曾裕祥表示:「予阮的桌仔耍抑是謀殺之謎的店頭有條件開放,若干焦靠零售,阮真正無法度;無法度靠散賣、只賣劇本按呢行落去。」

針對這寡業者的訴求,經濟部表示,照IN了解,指揮中心是已經有允准開放劇本殺的部分,另外桌仔耍的部份,IN嘛會共業者提供的防疫規範,報予指揮中心做溝通,予業者通有真正營業的機會。

相關新聞

專題|全台敬老金大調查