全臺降二級 父親節餐廳內食飯人陣猶原無增加

往過真濟家庭父親節攏會大大小小,去餐廳食飯感謝爸爸辛勞,毋過今年拄著疫情,袂少民眾猶是加減仔會煩惱,所以真濟業者表示,今年的生理佮往過是差真濟。

倚近食晝的時間,有民眾踮門口排隊,但是斟酌共看,店內人猶是無濟,排隊的較濟是等欲紮走的人客。

民眾講,「(敢會想欲佇外口食物件),袂 目前袂,就買幾項仔紮轉去食爾爾,無特別慶祝,因為親像嘛無拄好是七月時仔。」

民眾講,「(敢有訂位 抑是),無呢 就踮厝內食,只是講今仔日,欲買物件才來遮消費。」

往過父親節,餐廳人潮應該攏滿滿,佮這馬是差真濟,雖然拄好是節日也是雙北開放內用的第一个歇睏日,但是餐廳佮賣場美食街內底的用餐區,坐咧食的人猶是少數。雖然有餐廳表示,人潮有比進前好淡薄仔,毋過也無法度轉去疫情發生前的水準。

餐廳業者表示,「大概加三到四成,(這敢是講紮走的部份,內用的部份,像今仔日暗時敢有人客先約),有 目前大概一半左右。」

真濟店頭雖然攏遵照防疫規範咧做,但也真清楚人客驚無安全閣咧躊躇,也有餐廳猶原是只開放紮走的服務,面對疫情造成的改變,有店頭是無奈講,欲恢復以往逐家歡樂慶祝的氣氛,可能閣愛等一段時間。



 

相關新聞

專題|全台敬老金大調查