女性文化地標揭牌 感謝林媽利貢獻輸血醫學

牌面的圖樣是有台灣輸血之母稱號的林媽利醫師，佮伊所tshuā-niá的團隊，頂懸的菊花，象徵女性肯食苦佮堅強的一面，也是這陣血庫女子兵團的寫照。

台灣女性文化地標總策劃陳秀惠表示， 就是風中的波斯菊，就是講媽利醫生伊的一生內底，無足順序，伊經過困難、失敗，經過真濟的困難，但是伊從來攏毋捌失志。

自1980年代開始，林媽利醫師佮伊的團隊做伙建立台灣輸血標準、予捐血觀念愈來愈普遍，早期台灣血牛賣血的現象才沓沓仔消失，也降低輸血風險。這擺佇台北馬偕病院檢驗科頭前立牌，欲予外界知影這陣恬恬付出的人。

台北馬偕紀念醫院榮譽主治醫師 林媽利說，一般女性所做的工課，普通所做的努力，攏無人共你認定，囥這地標來予逐家會記得這件代誌，我感覺這對女性的權益仝款有幫贊。

文化總會的女性文化地標，是希望女性佇社會的努力受著外界重視。策展人表示，希望林媽利團隊雞母tshuā雞仔囝的精神會當延續落去。