驚大雨致災 屏東勘查光電廠施工煞見2粒未爆彈
陳嘉筠 賴威佐 / 屏東報導
發布時間：
更新時間：
目次
這幾工南部落大雨，屏東枋寮石頭營附近的庄頭也咧淹。屏東縣議員-蔣月惠，接著村民通報，煩惱光電廠佇山坪施工，會造成水崩山，伊佮文史工作者去會勘，煞意外發現著兩粒未爆彈，隨請警方佮軍方來處理。
排水溝水流真緊，內底閣有真濟塗沙，屏東初一落規工的大水雨，有縣議員佮文史人士，煩惱石頭營遮會水崩山，做伙來到石頭營光電廠佇山頂施工的所在勘查，煞佇山坡地的塗沙底發現一粒未爆彈。
屏東縣議員蔣月惠講，「看覓到底山坡水土保持有做好無，結果就發現這个親像是未爆彈。」
紲落來閣佇附近發現另外一粒，連鞭通知警方佮軍方，軍方派人來處理這兩粒未爆彈，舊年石頭營嘛挖著13粒未爆彈，規个石頭營範圍有百公頃，毋知塗跤底閣有偌濟。蔣月惠要求著趕緊清查，光電業者應該愛停工。
屏東縣議員蔣月惠表示，「縣府應該愛共廠商講，是不是愛馬上停工，你無做，若是工人挖著未爆彈，性命危險的時陣，縣長就愛落台負責。」
生利能源代表張淑雯說明，「這擺發現的所在並無佇工區範圍，伊佇未開發區，未來每一个工區施工進前會先監測確定無問題，才開始施工。」
光電業者表示，這幾工屏東大雨，現場滯洪池佮排水道攏正常運作，嘛無淹水佮崩山的現象，認為庄頭村民毋免煩惱。縣府文資所表示，未爆彈舊年底軍方就清查一擺，毋過問題無好處理，干焦會當佇發現了後通報，目前業者無違法事項，縣府會持續監控。
專題｜改造地獄路 台灣行人路為何難行？
