王齊麟.李洋提著羽毛球雙打金牌 破臺灣奧運紀錄

東奧羽球男子雙打金牌國手王齊麟表示：「奧運獎牌，想欲到阮兩个竟然真正提著奧運金牌，我嘛真感謝李洋，願意佮我組團，佮我做伙去做，從2019年組團了後，拚命去衝，為著奧運的目標去拍拚。 」

回想奧運金牌戰，對戰中國選手，路尾連贏2場提著金牌，王齊麟佮李洋猶是感覺不可思議。東奧羽球男子雙打金牌國手李洋表示：「我相信毋但我，真濟人攏無想著會提金牌，若真正因為阮昨昏的表現，咱台灣人有予世界看著，按呢真正是感覺足幸運的。 」

羽球選手王齊麟和李洋，頭一擺拍奧運就提著金牌，全台灣攏真歡喜。毋過越頭看王齊麟佮李洋一路的過程，是一點仔都無簡單。

東奧羽球男子雙打金牌國手李洋𪜶老爸李峻淯表示：「五年仔李洋才開始接觸羽球，以早王齊麟是他的偶像，
你就知影，他偌慢開始練羽球。 」

王齊麟佮李洋是台北中山國中的同學，學生時代並無正式組團，大漢了後也佮無仝隊友合作，一直到2019年李洋轉隊去土銀，才開始佮王齊麟聯手，經過長久的訓練，成績愈來愈好。

東奧羽球男子雙打金牌國手王齊麟𪜶老爸王偉建表示：「我一直真感謝陳宏麟，伊替王齊麟揣合作的對象，李洋是在合庫，齊麟是在土銀。 」

舊年全英公開賽，王齊麟佮李洋拍入去四強，了後佇泰國連紲提著三个冠軍、15擺連贏。參加奧運了後，進前使予印度，毋過紲落來谷底反彈，連贏英國、印尼，閣打贏日本、印尼和中國的組合，提著金牌。

東奧羽球男子雙打金牌國手李洋𪜶媽媽表示：「恭喜你，這改的表現真出腳，希望你以後的比賽，閣繼續拍拚。 」

東奧羽球男子雙打金牌國手王齊麟𪜶老爸表示：「我希望講，咱提著奧運金牌像爬玉山，雖然提著光榮，猶是愛繼續替台灣奮鬥，知影無。 」

王齊麟佮李洋，用視訊和厝內的人報喜，嘛感謝各界的支持，也答應未來會繼續拍拚，迎接新的挑戰，予台灣佇國際舞台持續發展、持續發光。