7/27降二級警戒 嘉義縣9日照中心通恢復運作

嘉義縣社會處表示,縣內有真濟民眾需要社區的長照服務,縣內18間日照中心,其中9間有通過防疫計畫審查,對7/27開始就會當開始照顧序大阿。

說明防疫計畫的安排,共活動的空間分開,甚至閣愛規劃一个所在,予有發燒症頭的人,會當治療檢查。申請27欲復業的日照中心講,有真濟序大佮家庭,誠需要社區的長照服務。

嘉義基督教病院副院長 陳煒:「序大佇厝,因為無佮人接觸、照服員的照顧,In的活動功能嘛會漸漸喪失衰退,這嘛是誠濟家屬煩惱的所在。」

嘉義縣目前有18間日間照顧中心,申請欲佇27復業的日照中心有9間,社會局表示,這9間中心的工作人員,攏愛注過預防射,欲轉來的序大若無注疫苗,嘛需要提供抗原篩檢抑是PCR檢驗的陰性證明。

嘉義縣政府社會局代理局長 張翠瑤:「阮工作人員佮內底序大疫苗的接種率,敢有到80%,第二就是日照中心的健康管理佮空間環境的安排,閣有紲後維護的情形。」

社會局表示,社區日照中心的復業,會當照顧一寡失能的序大,嘛予in的家庭會當歇喘一下,會隨時來檢查縣內所有日照中心的防疫管理,保護工作人員佮序大的健康。

相關新聞

專題|全台敬老金大調查