"烟花"帶大雨 嘉義檢查抽水機.水門拚防災

水利處人員向縣長報告目前嘉義縣內，抽水站佮水門的數量佮情況，另外閣設置228台抽水機，佇縣內地勢低的所在做準備。

嘉義縣政府水利處副處長朱崧豪講，「遮的滯洪池佮抽水站的前池部份，阮佇這个風颱進前、汛期進前，阮攏有通報相關公所佮相關管理單位，預先共伊排空。」

嘉義縣沿海一寡鄉鎮，因為地勢比海平面閣較低，排水較慢，過去東石鄉就捌發生嚴重的淹水，提早共抾水池排空，就是希望會當加強排水的速度。朱崧豪講，「天然的重力排，水往低處流的重力排的這種效能，予水用上短上緊的時間，流入去滯洪池內底，予佇地勢低所在的雨水，一直積佇內底。」

嘉義縣長翁章梁表示，「引進智慧防汛網，佗位淹水阮有感應設備，包括抽水機佇啥物所在啥物位置，是毋是有咧抽水，攏會當佇系統看會出來。」

水利處指出，目前縣內241座抽水站佮479座水門，攏有正常運作。縣政府嘛呼籲，除了沿海鄉鎮愛注意大水的問題，山區的民眾嘛愛隨時注意土石流的消息，避免發生閣較大的災害。