今仔日開始，第九類、第十類的民眾會使注預防射矣，有來注射的民眾講，這馬對AZ疫苗的安全性，已經無遐煩惱矣。最近台灣各地頭攏傳出有人兩擺注無仝牌子的疫苗，指揮中心講，會研究敢欲處罰，毋過嘛當咧討論疫苗混合注射的效果。
醫護人員確認身份，寫資料。16開始第九類、第十類的民眾會使注預防射，注射站的人比昨昏加真濟。這擺注的是AZ疫苗。AZ疫苗捌有安全性的疑慮，毋過來注疫苗的民眾講，這馬已經無咧煩惱矣。
注疫苗民眾講，「阮專工去病院問專業醫生，醫生嘛建議有疫苗就緊來注。」另外一个注疫苗民眾分享講，「我家己有研究過，注完若是真正無爽快，48點鐘以內攏知影症頭，我感覺應該攏毋是真大的問題。」
毋過最近，台灣各地攏傳出有人兩擺疫苗注無仝牌子的消息，指揮中心捌講，會要求注射站愛加強檢查民眾的健保資料，嘛會研議是毋是愛開罰。16指揮中心表示，專家小組嘛當咧研議，AZ佮moderna疫苗混合注的可能性。
疫情指揮中心專家諮詢小組召集人張上淳表示，「彼時陣阮看著AZ加BNT、AZ佮BNT的混注模式，確實比AZ佮AZ免疫反應閣較好，更加理想。但是AZ佮BNT是毋是就會使變成AZ佮Moderna，國外有小規模研究AZ佮Moderna，AZ佮Moderna免疫反應比AZ佮AZ較好，有按呢的國外資料，我感覺疫苗諮詢小組嘛會使對這个結果，看是毋是閣召開一擺會議。」
張上淳表示，國內嘛有團隊佇咧研究混合注疫苗，但是閣愛一段時間的觀察，才會當有結果，過程有相關的資料，專家小組嘛會來做參考。