高雄流行音樂中心做注射站 那看表演那注射

各縣市攏咧拚注預防射，猶未開放的高雄流行音樂中心，今仔日嘛變做大型注射站，按算一工上濟會當注3千人，市政府也有現場放歌手的演唱會影片，予民眾心情放輕鬆。

接著注預防射通知的民眾，陸續來到高雄流行音樂中心海音館，遮頭一擺開放，現場準備132个位，攏是65到66歲的民眾，講是來注預防射，現場煞有歌手李宗盛演唱會的影片，注射閣會當看表演，真濟人閣翕相做紀念。

民眾黃先生講，「有夠媠，環境有夠媠，閣輕鬆閣涼。」民眾講，「袂䆀啊，閣放李宗盛，我真佮意。」

佇港邊的海音館原底這個月欲開幕，煞拄著疫情，想袂到這馬成做民眾注射兼看表演的所在。高雄市長陳其邁特別來了解注射的狀況，伊笑講欲用上媠的風景共民眾唌來注射。陳其邁表示，「用唌的嘛愛共in唌來，所以遮可能是全國風景上好，服務上好的一个注射站，未來因為嘛會開放登記，阮盡量擴充伊的量能。」

除了海音館一工上濟注三千人，另外閣有展覽館佮高雄巨蛋，三个大型注射站掠算會當注一萬四千人，15這工是一個月來注上濟人的一工，16開始欲開放予線頂預約的民眾，市府欲拚緊注射的速度，希望月底疫苗覆蓋率有三成。