嘉義市天文教育聯盟佮嘉義縣科學教育中心，配合嘉義的國校仔佮電台，共同製作廣播節目「天文 know idea」，攏總34集，7/5會開始放送，希望予家長佮囡仔佇厝裡，嘛有另外一个學習的選擇。
老師佮學生唸跤本錄音，嘉義天文教育聯盟佮蘭潭國小，為著欲予學生佮家長佇歇熱的這段時間，會當學習天文智識，特別合作製作34集的天文廣播節目。
陳同學:「雨水連綿是豐年，農夫不用力耕田。這意思就是講，如果雨水的彼工落雨，今年農民的收成就會誠好。」
嘉義市天文協會理事長莊明娟說，「希望利用這个廣播節目，多元化的設計，予咱的囡仔會當有無限想像，嘛開破in的好奇心。」
一集一點鐘的節目，內底攏會有6个單元，毋但有豐富的天文智識，閣有二十四節氣、台語俗諺語佮英語的內容。蘭潭國小表示，對7月初5開始，一直到10月26，拜一佮拜二的中晝12點，佇電台佮網路攏會來播出。
謝同學說，「錄進前愛先練幾若擺。」
嘉義市蘭潭國小校長邱榮輝表示，「會當佇 FB 佮 Youtube 閣有 podcast 相關的管道來做收聽，雲嘉南的民眾，會當透過電台來收聽，來收聽這个天文know idea的節目。」
為著鼓勵民眾收聽，主辦單位閣佇節目當中安排有獎徵答，希望佇疫情佮歇熱的這段時間，增加親子生活自然的話題，嘛學著天文的相關智識。