臺中2水庫添2550萬噸水量 加強限水措施暫停

這陣黃酸仔雨對臺灣的水情加減仔有幫助。親像臺中鯉魚潭佮德基水庫,大約有增加2千550萬噸的水。本底對6/1開始,新竹、苗栗、臺中、彰化等等的限水措施,目前先攏暫停。

這兩工因為黃酸雨鋒面影響,各地攏有落雨,尤其替洘旱嚴重的中南部地區,帶來袂少幫助,水庫集水區,累計平均降雨量達到100毫米以上,原本6月初1欲實施的限水加強措施,嘛先暫停。
 
洘旱中央災害應變中心指揮官王美花:「原本六月初一,佇新竹實施的紅燈分區供水,閣有苗栗、台中、北彰化,停水閣延長八點鐘的加強儉水措施,阮攏會先暫停實施。」
 
這遍的鋒面替水庫增加成萬噸的水量、超過一個月的供水效益,經濟部水利署參台水公司,今年閣開發彰化市烏溪河濱廠的伏流水,希望佇6月底達到四萬噸的目標。
 
自來水公司十一區管理處長曾良琳:「水若較濁大約(每個月)提供八千噸,水若清氣大約(每個月)提供一萬噸,預期目標欲達到四萬噸,大概愛到六月底的時陣。」

雖然這場雨落了拄好,但這陣倚近彰化地區一期稻作的收割期,也愛特別注意短時間大雨,對農作物是毋是會造成傷害。
 
農田水利署彰化管理處陳股長:「針對轄區內的水門,攏愛去檢查維修,佇可能發生大水雨災害的期間,愛妥善做好準備。」
 
洘旱中央災害應變中心提醒.這幾工的雨水,無法度完全解除缺水問題,呼籲民眾繼續儉用水,莫浪費,才會當做伙度過洘旱危機。

全台敬老金大調查

相關新聞