高雄學校線頂直播天狗食月 學生踮厝也通欣賞

天狗食月，月全蝕，5/26暗是今年月球上蓋接近地球的一工，咱會當看著真大粒的紅月娘。高雄就有學校天文館網路直播蝕月的過程，予眾人佇防疫期間，會當佇厝內欣賞這个天文奇景。

26暗時六點半，你敢有攑頭看月娘？今年上大粒的滿月，加上月全蝕，同齊出現。高雄的天頂雲真厚，毋過猶是會當看著蝕月，而且大大粒的月娘變做紅柑仔色，紲落來，才沓沓仔恢復月圓，規个過程，佇全台灣真濟所在攏看會著。
 
高雄前鎮高中天文館，嘛透過天文召鏡線頂直播，予學生佇厝內就會當看著，大大粒閣紅紅的超級月娘，港和國小真重視天文教育，社團學生把握機會，準備真濟家私，暗時六點外就佇厝內露台，抑是厝頂，等咧看今年的超級月娘佮月全食，in嘛翕相片佮老師分享。 這斗月全蝕拄著疫情，港和國小取消逐家做伙用召鏡看月娘的活動，學生防疫佇厝內看，抑是看線頂直播，攏是難得的體驗。