全臺三級警戒 高雄街仔路假日冷清若空城

咱臺灣人為著防疫，自動減少出門，真正是值得呵咾，親像5/23禮拜，往過高雄人插插插的景點、百貨公司，街仔路是攏無人。毋過按呢煞也影響著一寡行業的收入，計程車司機佮擔仔的生理攏加足䆀。

高雄輕鐵佇上出名的駁二特區駛來駛去，車頂煞攏無人，平時一工萬外人，拜六規工才載648人，街路頂嘛看無遊客，干焦看著幾个運動、騎跤踏車的民眾，高雄防疫升級了後第一个歇睏日，人潮攏無去，來到西子灣嘛仝款，看無外地遊客佮移工。
 
排班的計程車司機，載無人客，附近的商圈，有開店的生理落七成，有的店規氣停業到28，毋但景點冷清清，北高雄原本上鬧熱的這間百貨公司，因為內底一位專櫃小姐確診，百貨公司宣佈停業三工消毒，附近嘛無人踅街，另外高雄市早就宣佈，600外座公園的遊樂設施佮亭仔攏愛封起來，避免群聚，連運動埕的籃球框嘛用索仔縛起來，袂當使用。
 
雖然無人，賣塗豆的嘛是準備欲排擔仔，伊講這馬做生理趁三頓爾，高雄街路車少人愈少，民眾配合防疫，減少出門，逐家攏希望會當度過難關。