臺北的艋舺煏出確診病例，臺北市長柯文哲宣佈講，舞廳、酒吧、夜店這寡娛樂場所佮公家機關所管的場所，對15開始暫停營業。萬華區公所佮市政府外部辦公室，對後禮拜一開始進行分區辦公。另外，臺北市和平病院，昨暗增加2个確診病例，市長柯文哲表示，目前和平病院猶無封病院的問題，也會佇艋舺地區成立第四个快速篩檢站，欲緊揣出社區內的感染者。
台北市副市長 黃珊珊:「等一下阮嘛會佇今仔日發布，公有場館佮主要是八大行業、佮電子遊戲業、網路咖啡廳的停業通知。」
台北市長 柯文哲:「逐家會問講啥時陣恢復營業，我想這愛看疫情的發展。」
另外，為著緊揣出社區中的確診者，除了原底和平病院 西園病院 中興病院，市府會佇剝皮寮設立萬華地區第四个快速篩檢站。快速篩檢站的作業時間對早時8點開始、到暗時12點。建議4月15以後，包括有去過艋舺茶店仔的工作人員、人客；若有發燒抑是相關症頭，佇萬華地區買藥仔抑是看病的民眾；有症頭佇其他地區看病的萬華地區民眾；無厝者、新移民配偶、弱勢族群；抑是有意願篩檢的民眾，攏會使來快速篩檢站篩檢。In嘛強調，無身份證的外籍移工若來就醫抑是篩檢，攏會有特赦。
陳時中表示，目前和平病院會以接觸的強度跟密度做標準判斷，以仝心圓的方式，一沿一沿向外篩檢接觸者。另外，因為萬華地區的民眾較有吃成藥的習慣，這馬嘛鼓勵藥師，建議有感染疑慮的民眾去篩檢。
台北市副市長 黃珊珊:「健保卡佮身分證，阮希望你兩項攏紮，愛主動講你的旅遊史佮職業。」
衛福部長 陳時中:「這馬內底攏是佇咧擴大篩檢，只要你感覺有需要，就會使去篩檢，攏是公費的。」