人講，醫者爸母心。陳翠玉女士，佇國民政府來臺的時，共西方的護理教育經驗佮制度引入臺灣，提升臺灣病院佮護理教育的水準。十二是國際護師節，臺大護理學系，特別舉行陳翠玉女士的女性文化地標，掛牌儀式。
揭開花布，這是陳翠玉女士的銅像，背後南丁格爾攑燈的模樣。國際護師節這工，佇台大護理學館頭前，透過陳翠玉的女性文化地標，紀念這位台灣南丁格爾的奉獻。
地標設計藝術家王秀杞:「南丁格爾攑燈，是伊真代表性的畫面，所以就共護士的元素加起來，來創作這件地標。」
1945年，國民政府接收台灣，陳翠玉為著欲創立「衛生司」，予當時的官員當作是目內刺，差一點仔列入去228事件的銃決名單；1948年，陳翠玉引入西方的護理教育經驗，改革台大病院的制度；1950年，陳翠玉閣創辦台大護校，佇學校實行鼓勵學生獨立思考的美式教育。
台大醫學院院長倪衍玄:「因為佇過去台大醫學院的歷史上，陳翠玉校長的名是予抹烏的，是無存在的。」
監察院院長陳菊:「伊佮世界衛生組織的接接，伊為著濟濟弱勢 落後地區，人民的健康、護理的奔波努力，但是佇彼个階段，真僫予當時的統治者接受。」