石碇鹿窟事件 事發地辦展覽.望民眾瞭解歷史 - 公視新聞網

石碇鹿窟事件 事發地辦展覽.望民眾瞭解歷史



發生佇1952年的鹿窟事件,是當時執政的國民黨政府,針對中共地下黨所發動的大規模鎮壓行動,真濟史料到今攏猶未公開。國家人權博物館和大坑產業文化協會,做伙舉辦鹿窟事件展覽,希望用一幅閣一幅的圖影,講出受難者的故事。

一張一張的圖畫,來講出對阿公的記持,同時也是鹿窟事件的經過。
 
鹿窟事件是白色恐怖初期,台灣上大的一件政治案,當初無經過詳細的調查,政府就用公權力將人掠起來,毋但予掠起來的人上濟,尤其閣牽涉著規家伙。
 
1952年潘炳輝突然失蹤,1960年閣雄雄轉厝內,潘炳輝變甲無愛講話,這八冬的時間無人知影發生什麼代誌,孫仔潘世賢後來看相關的紀錄,才理解阿公的身軀頂,有啥物款的歷史傷痕。
 
用講故事的方式予民眾理解,當初潘家的經歷,猶毋閣鹿窟事件的真相到底如何,其實真濟的國家檔案、歷史資料攏無公開。"圖說鹿窟事件"的展出,用人佮人的關係來思考,過去發生佇這塊土地歷史,感受大時代下底的社會氣氛。

相關新聞

留言區