"再見民主先生" 回顧李登輝推動民主化

公視台語台「再見、民主先生」的新聞專題，前總統李登輝佇執政的12年之間，骨力推捒民主，毋但廢除萬年國會、修改憲法，推動總統民選制度。有學者認為李總統運用時機、綴牢社會變動的勢面，伊對民主的貢獻，也會永遠留踮佇每一个台灣人的心肝內。今仔暗時十點，公視台語台抑會播送，由公視製作的李登輝紀錄片，而且是全臺語配音佮臺語字，頭佮尾也有主持人佮來賓討論李總統的歷史定位佮好䆀，邀請觀眾朋友鬥陣收看。

超過一千名大學生聚集佇中正紀念堂抗議，要求解散國民大會、廢除臨時條款、召開國是會議，1990年野百合學運，就佇李登輝接任第八任總統的第三年發生。

為著回應訴求，李登輝總統邀請學生代表入總統府會談，這也是有史以來，頭擺有國家元首用這種方式了解民意。

野百合學運結束的隔轉年1991，李登輝宣佈廢止動員戡亂時期臨時條款，同一年廢除國民大會，到1994修改憲法，通過總統直選制度，1996年，李登輝順利當選，成做臺灣頭一位民選總統，2000年臺灣頭擺政黨輪替 。

捌佇世界各國捒臺獨，做台灣獨立建國聯盟主席19年的張燦鍙，就是佇李總統任內，伊才決心轉來臺灣。

對威權行來到民主，張燦鍙講這是民主火車起行，2000年到2016年，臺灣完成三擺政權輪替，成做亞洲國家民主典範。不過台聯黨主席劉一德也講出李登輝心內對民主發展的掛心。

2020年7月30，前總統李登輝與世長辭，歲壽98，伊對深化民主、創造自由開放的臺灣所做的付出，相信已經留踮真濟臺灣人的心內。