道長用紙糊神獸.古早厝 變做藝術品

紙糊藝術佇濟濟的宗教活動攏搬演重要的角色，臺南市學甲區有一位道長，伊叫吳文進，伊毋但對道學真有研究，伊也用紙糊做較細型的神獸和古早厝，予伊變做是一種收藏品，吳文進浸佇紙糊的世界四十年，今年臺南市政府共伊登錄做紙糊這項傳統工藝的保存者，肯定伊對這項傳統文化藝術的堅持。

共這隻會使上傳天意、下傳民情，觀世音菩薩的坐騎─金毛哮，提佇手裡，台南市學甲區吳文進道長，毋那對台灣鯤鯓王平安鹽祭的各種道教科儀真有研究，伊也是紙糊藝術的老師傅，糊紙四十年矣，不管是古早厝、神騎、或者是普渡公，吳文進攏有法度黏出來。

吳文進其實是國中畢業，才綴伊的阿舅學做紙糊矣，雖毋曾上過任何相關的課，不過伊的目睭真利，真會曉觀察，真快就掠會著各種神獸的表情和線條，糊出來的作品，攏真幼路。今年吳文進被台南市政府登錄做傳統工藝糊紙的保存者，不過伊講傳承紙糊技藝的路，才拄開始。

吳文進創遮較細型的紙糊作品，予伊成做是一種收藏，改變往過紙糊品佇科儀活動結束，就愛化掉的命運，用紙糊品妝娗厝裡，也變甲真時行。