鄭欽文靠家己接枝 培育各款蓮霧真交易
發布時間：
更新時間：
屏東新園鄉青農鄭欽文，靠著自己接椏，種出十外種無仝型體的蓮霧，伊希望予逐家食著五花十色的蓮霧，攏會當感覺幸福。
捌入選第4屆百大青農的鄭欽文和人無仝款，伊特別佮意栽市面上色水罕見，抑是果子形無相SIÂNG的蓮霧。伊的田裡毋但有清芳的白玉蓮霧，閣有紅色、黃色，以及甜閣脆的綠色蓮霧。
鄭欽文大學是讀資訊傳播，捌在臺北做過出版業和電子科技業的主管，四冬前因為老母身體無好，伊才會放棄臺北月給真懸的頭路，轉來故鄉學種蓮霧。
蓮霧收成了後也著賣，鄭欽文除了家己佇網路銷，有時陣嘛會和網路平台合作，甚至推出限量的「五花十色蓮霧」禮盒。伊希望家己種的蓮霧，質和量會使愈來愈好，也向望用濟色的蓮霧拚出家己的一片天。
