昨昏香港民族黨前任的召集人陳浩天、閣有早起，香港眾志這黨的秘書長黃之鋒，和眾志的黨員周庭，攏已經去予警方掠起來。香港眾志發表聲明講，現時猶閣毋知影黃之鋒和周庭，是去犯著佗一條罪，也已經請律師咧鬥相共處理。抑黃之鋒本人，原底已經有安排好勢，九月的時，是欲專工來臺灣訪問。


香港眾志發表聲明，指出講，早上7點半，黃之鋒咧行去地下鐵電車站的半中途，雄雄予人拖入去一隻轎車內底，押對灣仔警察總部去，過無偌久，閣有消息講眾志的另外一个黨員周庭，嘛佇in兜予人押去警察總部。／抑主張「香港獨立」的陳浩天，是昨昏準備欲去日本的時，佇咧香港機場予人逮7捕。／咱台灣總統府的發言人丁允恭有表示講，總統府針對香港民主運動人士隨个仔予警方捧去，猶原也真斟酌咧關心，相信講，香港這陣需要的是溝通，毋是鎮壓。