高雄旗津阿媽半暝揣無路 狗仔ﰓ路順利轉厝

高雄市中洲派出所員警
姊仔 你蹛佗位敢知影你敢有證件攏無
 

坐佇電動車頂懸的婦人人，員警問啥攏應袂毋知，干焦知影家己叫啥名。高雄旗津有大學生發現這位阿媽三更半暝一个人行佇路裡搖搖擺擺，驚老大人發生危險趕緊報警，員警到場想要送阿媽轉去厝，毋過阿媽毋但身軀頂無證件，就連年歲、厝蹛佗攏想袂起來。

高雄市中洲派出所員警
按呢就毋知影你的厝佇佗位我駛車載你去揣

員警想無步決定駛車載阿媽那踅那揣厝，車才駛振動，一直綴佇阿媽邊仔的一隻白色的狗仔就傱代先，而且閣沿路行沿路越頭看車有綴起來無，員警規氣駛車對伊行，想袂到竟然真正揣著阿媽ﰀ兜。警方表示，阿媽姓林，今年已經八十歲矣、記憶無蓋好，厝內底賰伊佮後生兩人，後生因為食頭路，佇厝的時間無濟，平常時攏是小白佮阿媽做伴。

高雄市鼓山分局中洲派出所長 劉學文
婦人人養飼的臺灣土狗 小白竟然展現出驚人的靈性佇巡邏車頭前ﰓ路成功ﰓ警方共主人護送到厝

高雄市社會局長青中心主任 于桂蘭
預防失智序大抑是心智障礙佮精神障礙朋友走無去提供安心手鍊的申請手鍊仔頂懸有刻家屬的電話若序大走無去的時陣市民朋友抑是警察局會當透過聯絡電話去聯絡著家屬

警方表示，阿媽走無去的所在，其實離in兜干焦兩百公尺，佇咧了解阿媽的狀況了後，後續會加強關懷，另外社會局也強調，會主動去關心這个個案，而民眾厝內序大若有失智的狀況會當共in申請安心手鍊仔，若無拄好人走無去，就會當隨時連絡著家屬。

記者許嘉茹 邱紹揚 高雄報導