中國橫霸取消濱崎步演唱 陳其邁:歡迎來高雄

日本歌手濱崎步，原訂11月29欲佇中國上海舉行演唱會，上萬張的門票早就攏賣了了，毋過煞佇演唱會的前一工，予中國政府施加壓力，被迫取消演唱會。
後來濱崎步，完全無受影響、照常開演唱會，就算台跤一个人就無，伊也真專業、真骨力唱，對第一條、唱到安可。演唱會結束，濱崎步也佇社群發表伊的心聲，講家己雖然面對14000个空空的座位，毋過煞感受著世界各地歌迷的疼惜，這是伊上難忘的演唱會。臺灣網友隨留話表達支持，講臺灣真歡迎伊來。

民眾
相信臺灣有足濟濱崎步的迷眾所以歡迎來臺灣

民眾
我感覺中國的歌迷應該會不止仔期待毋過因為可能是一寡政治因素逐家無法度參與我感覺這是三方攏輸的狀況

最近真濟韓團來到高雄開演唱會，規个城市是鬧熱滾滾，高雄市長陳其邁，也熱情歡迎濱崎步，來高雄開演唱會，也認為藝術無應該受政治干擾。

高雄市長 陳其邁
我個人真佮意濱崎步演唱會藝術文化無應該受著政治的干涉予ﰀ通自由的表現當然才會有愈發展的演唱會

面對中國的打壓，濱崎步也無咧客氣，後續也佇社群，連續轉發幾若篇臺灣的新聞，有網友看著了後也笑講、這改中國真正共濱崎步氣著矣、也予全世界看著中國無站無節、偌無理。

記者 鄭亞宣 林郁凱 臺北報導