臺灣選手代表中國比賽？ 教練：非官方的邀請賽

高雄市議員 陳麗娜：「這內底有咱高雄的選手，姓鍾的、姓吳的、姓何的三位。」

議員提相片出來質詢高雄市府，講有高雄的趨輪曲棍球選手佮教練，去中國穿怹的球衫、代表中國的城市去參加全國比賽。議員認為，內面有現役選手提高雄的運動獎金煞閣去中國做人的代表隊比賽，按呢哪會著，要求運發局愛查予清楚。

高雄市議員 陳麗娜：「咱攏向望咱（選手）就是代表中華民國，阮無希望咱選手是雙跤踏雙船。按呢若有一工有選手真正徛起去國際舞台，伊去比奧運的時陣，伊到底欲代表啥人。」

針對議員的指控，有當事教練出來說明，講議員可能有誤會，因為相片內底參加中國官方比賽的攏是已經退役的選手佮教練，現役選手參加的是一般俱樂部辦的交流比賽，這部分無違反中央的規定，另外高雄體育會也講，確實有退役教練換去中國教，怹尊重個人的選擇。

當事教練 歐佳和：「彼三个攏是8年、10年前就去中國食頭路的一寡仔選手抑是教練，（濫濫）囥做伙講，講是仝一个比賽，按呢就有淡薄仔違反事實。」

高雄市體育會滑輪溜冰委員會副總幹事 連高振：「你的場地就是遮爾濟，你欲予遮濟教練去從事這个教學，事實上就有伊的困難點。」

高雄市運發局主秘 林建良：「全面清查所有選手佮教練的身份資格，若有違反中央的規定，就會依法撤銷資格、停權、討回獎金。」

體育會認為，臺灣的趨輪溜冰技術好，毋過市場細，所以有退役選手佮教練選擇去中國𤆬隊。高雄運發局是強調，臺灣選手代表臺灣，這是基本價值，市府會嚴查嚴辦，只要違反規定，就會追究責任。

記者 許嘉茹 邱紹揚 高雄報導