男性紮500萬予人劫去 隨有一篷人綴來搶走

一台白色的車對停車場駛出來擋佇咧路口，準備欲接應已經搶著五百萬的同伴，其實路邊另外一台白色的車頂，是另外一組搶匪當咧等。高雄三民區這搭停車場，九月發生搶案，咧做房地產投資姓葉的查埔人，早起用揹仔紮五百萬現金欲去上班，半中途去予姓應的嫌犯濺薟椒仔水搶劫，五百萬的現金全部予搶去。

報案民眾：「予搶劫捾兩跤烏kha-báng，內底差不多四、五百萬，佇遐予濺甲規个面，薟椒仔水濺甲規个面攏腫歪歪，面嘛烏青。」

高雄市三民一分局員警：「來，莫振動！來，莫振動！警察，趴落去！莫振動，落車。」

高雄警方一路循線對臺中、桃園、臺北揣起去，兩工內就共涉案的八名嫌犯攏掠起來，毋過檢方一查才知影，原來彼工有兩篷人欲搶這五百萬，先下手用薟椒仔水搶錢的，是姓梁的主嫌𤆬頭的，另外一篷袂赴下手的嫌犯，看勢面毋著，相準時機，車駛去邊仔，隨共錢搶過手。

高雄地檢署襄閱主任檢察官 林志祐：「另外有姓余的被告等人，嘛已經代先得著消息準備欲搶劫，發現姓梁的被告等人已經先搶到手，落尾就揀佇姓梁被告等人上車會合的時陣，提斧頭、西瓜刀等凶器
去共五百萬搶過手。」

檢方表示，因為兩篷人攏無欲交代清楚，為啥物知影受害者彼工會紮遐濟錢，除了照強盜罪起訴，向法院請求8年以上重刑以外，也會繼續追查幕後是毋是有烏手。

記者 許嘉茹 邱紹揚 高雄報導