花蓮罹難者頭七法會 家屬批評縣長攏無關心

那哭、那唸祭文，花蓮縣長徐榛蔚，拜二佇花蓮瑞穗性命紀念園區，替罹難者舉辦頭七法會。

「佗位有儀式，家屬攏佇後面，伊到底是欲創啥？（徐榛蔚）妳佇頭前翕相就會當是毋是？」

毋過雄雄有罹難者家屬真受氣，衝出來罵縣府，家屬表示花蓮縣府一陣官員到靈堂了後，無第一時間先去關心家屬，就走去頭前拈香、唸經，就家己開始祭拜。想著代誌發生彼工，罹難者家屬嘛是真受氣，因為伊的媽媽根本毋知影愛撤離。

罹難者家屬：「（出代誌彼工）透早我敲電話予阮阿母，然後伊講毋知影（愛撤離），伊仝款過伊的生活，攏毋知影仝款；下晡閣敲予伊的時陣，就已經啥物攏無矣，罹難矣，完全無伊的資訊矣。」

罹難者家屬：「我才拄結婚爾爾，現在我閣欲辦喪事，我欲按怎？」

根據花蓮縣政府的統計，崩山湖災情攏總造成18人死亡、目前閣有6个失聯。抑若罹難者的遺體，目前先囥佇花蓮瑞穗性命紀念園區等待火化。花蓮縣政府也啟動「一戶一社工」機制，提供罹難者家屬必要的協助。

「阿公行，我𤆬你來去遐（掠龍）。」

社工𤆬阿伯去掠龍，因為拄才已經和阿伯開講一點鐘，這是佇光復鄉大進國小內底，所設的關懷輔導站，內底也有心理師會照三頓去關心蹛佇收容所的200位居民。

花蓮玉里病院臨床心理師 賴雲騰：「這馬的情形較像是，開始進入一个穩定的階段，日時災民會轉去家園重建，留落來就是一寡親像是老人囡仔。老人或者是囡仔，怹較袂主動過來，所以阮會主動出擊去關心逐家。」

台語台記者 鄭亞宣：「除了掠龍現場，也有提供鉸頭毛、唱歌等等的活動，希望會當予災區居民的心情放輕鬆；另外罹難家屬的部份，關懷站未來也會繼續追蹤，關心怹的身心狀況。」

記者 鄭亞宣 許猛㨗 花蓮報導