因為西南氣流灌入來,臺南後壁對7/28翻點開始就摔大雨,到下晡2點半,雨水量已經超過400毫米,誠濟車路攏淹水、交通斷站,公所也請求國軍來鬥送便當、撤離民眾;有的所在已經淹到70公分懸,民眾的閘水枋、抽水機攏提出來用,猶是袂赴落雨的速度。(新聞標題、導言及內文皆為台語文)
掣流的水流過台南後壁芳榮米絞頭前的這條路,規條車路已經成做水路,米絞是閘水枋抽水機全出動,雖罔將水擋佇咧外口,毋過大雨落袂停、水都敨袂離,看著外面已經淹甲七、八十公分懸,居民講,這擺的雨,比進前的莫拉克閣較驚人。
後壁居民:「阮進前內底無(淹)入去,我今仔日和規个內面全部,房間內底全部馬攏(淹)入去。(這上嚴重的一改就著啦。)著著著。(大概淹上懸到佗位抑是幾公分?)我門跤口遮差不多七、八十公分。」
因為雨真正是規桶倒,包括後壁、白河、鹽水攏傳出淹水災情,誠濟民眾的厝攏像按呢,水已經淹甲跤頭趺懸,家具攏浸佇咧水底,民眾講,頂回風颱才拄款甲差不多,這陣閣落遮大水雨,怹真正無奈。
後壁居民:「才小可仔感覺拄經過頂一个風颱的損蕩爾爾,有淡薄較正常爾,結果今仔日閣淹水矣。著啊,真正是會感覺講,這日子欲按怎過。」
因為四界車路攏淹水,車輛無法度出入,針對後壁、白河、鹽水一寡仔地勢較低的所在,已經先做預防性撤離,目前3區八里攏總撤離82个人,抑因為後壁地區淹水的所在濟,袂少居民受困、無才調出門,公所也緊急請軍方支援,開大卡車去送便當,同時做預防撤離。
臺南市後壁區長 李至彬:「阮目前撤離,是撤離佇活動中心攏總有8个人,透過消防隊共怹救出來,目前是直接收容佇遐(活動中心),有五个查埔人佮三个查某人。」
雖罔下晡台南地區的雨有較細,毋過氣象署表示,受著西南氣流的影響,中南部到拜三進前的天氣攏無穩定,隨時會摔大雨,民眾猶是愛提高警覺,注意防災。
記者 李晨宇 許嘉茹 邱紹揚 台南報導