7/22開始，臺北市298个場所，禁止店家免費提供用一改就抨的餐具，上無愛共消費者收1箍，希望達到糞埽減量，猶毋過，這項政策猶是有民眾毋知影。臺北市環保局表示，目前到年底攏袂罰錢，未來嘛會加強宣導。（新聞標題、導言及內文皆為台語文）
真濟人會共三頓包轉去食，猶毋過自7/22開始，臺北市府規定講，市府列管的298个場所，親像公家機關、學校、兒童新樂園，甚至是臺北地下街等等的店家，袂當免費提供用一改就抨掉的碗、箸佮湯匙仔，上無愛共消費者收一箍，希望促進民眾有環保意識。有民眾表示猶閣毋知影這个政策，猶毋過嘛有民眾講，若是欲收錢，就會拍算家己紮。
民眾 潘先生：「無呢，毋知，就家己攢才紮轉去就好矣。」
民眾 陳先生：「當然就是紮家己的餐具，（政策）按呢嘛是會使，我感覺就鼓吹環保。」
民眾 鄭小姐：「猶是上希望怹有會使循環使用的餐具。」
猶毋過就有店家反應，目前猶是會拄著毋知影這項政策的人，會誤會講是怹共消費者騙，店家希望臺北市府愛閣加強宣導。
店家 吳小姐：「影響真大，親像這个場所，真濟人攏會分咧食，人客點一份，可能就會共你討四到五份的餐具，對店家來講餐點的成本就會變懸。」
環保局表示，這个政策是照「臺北市淨零自治條例」實行的，目前有請一寡餐廳提供循環餐具，嘛有咧共店家宣導，另外也有貼海報宣傳，環保局預估新措施施行以後，預估臺北市1年通減少2700萬个一改性的餐具。
臺北市環保局資源循環管理科科長 林鈺惠：「阮希望會使鼓勵重複使用，來減少糞埽量。這个政策推行一段時間了後，阮會以成效和民眾配合的情形，來檢討和評估是毋是欲擴大適用的場所。」
環保局指出，這个政策到年底進前攏袂罰錢，猶毋過明年元旦正式施行了後，若是予人檢舉，就會罰三千到一萬箍，環保局講這段時間嘛會繼續加強宣導，向望消費者培養家己紮餐具的習慣，促進糞埽減量。
記者 魏宗仁 莊浚佑 臺北報導