城堞灌漿作業失覺察 紅毛塗若水沖流規壁堵

高雄鼓山區這棟五樓懸的透天厝當咧進行城堞的灌漿作業，毋過遮紅毛塗煞那灌那漏，甚至閣規个對五樓漏對邊仔的停車場落來，強欲規港倒的紅毛塗都親像是一道水沖仝款，附近住戶看著將畫面貼佇網路。有民眾來牽車看著畫面才知驚，伊講佳哉車無頓佇咧遐。

停車民眾：「有淡薄仔譀，這款。嘿啊，好佳哉無停彼爿，若是停遐可能就壞去矣。著啊（應該無代誌），目前應該猶會使，看起來無要緊。」

真正好佳哉，灌漿的時陣，無人無車佇咧下面，才無造成嚴重的傷害。建管處接著通報也隨會同相關公會的技師到場稽查，雖罔無立即性的危險，毋過因為包括灌漿的方式佮枋模的工法攏有欠點，建管處也當場要求停工，同時針對起造、承造佮監造人，分別裁罰五萬箍。

高雄市建管處長 沈崑章：「初步判定，應該是灌漿的方式，猶閣有伊弓模的部份有欠點。針對立即危險佮公共安全的部份，是無立即危險的，當然這个工地，阮已經隨勒令停工，嘛照建築法處罰。」

溢流落來的紅毛塗，工地人員已經處理好勢，毋過所有的紅毛塗水煞攏趕對水溝仔去，這部份環保局講已經違反廢清法，上懸罰六千箍，建管處強調，落尾廠商提交復工計畫書的時陣，也會要求怹，愛將水溝仔的紅毛塗處理好勢。

記者 許嘉茹 邱紹揚 高雄報導