民眾熱人耍水著愛會曉注意安全，親像新北市消防員駐水的所在，就是發生佇「白水區」，專家表示，白水區就是水沖落來的所在，看起來有真濟白色的泡，事實上人若走去遐，就算有穿救生衣嘛無一定浮會起來，上好是毋通過去。民眾除了愛有自救技巧佮安全裝備，判斷水域環境敢有安全也真重要。（新聞標題、導言及內文皆為台語文）
「我算到3就抨喔，3。」
共囡仔掠懸懸抨出去，予囡仔用自救技巧，對水母泅轉做向天泅，轉來岸邊。張景泓老師長期咧教水裡的自救技巧，伊表示這幾年民眾的安全意識有增加，願意來上這款課，毋過逐年熱人猶是有真濟人耍水出意外。張景泓認為欲耍水進前，除了水域的安全評估，嘛著了解會曉泅水佮會曉自救是無仝款的代誌。
像一條魚創辦人 張景泓：「就是你若真正無細膩跋落去水裡，你愛學會曉咧踏袂著底、無泅水鏡的狀況下底按怎泅水；自救已經是你意外跋落去水以後，愛會當楗到人來救你的最後一步。」
熱人是耍水的季節，最近袂少所在發駐水意外，根據消防署的統計，最近五年內平均逐年有81人發生駐水事故，上定出代誌的就是溪邊佮海邊仔。最近新竹上坪溪反船駐水佮新北消防員駐水，攏是發生佇「白水區」，有專家表示，若看著水裡這款白白有真濟泡的所在，代表水裡的浮力真細，就算有穿救生衣嘛無一定浮會起來。
台灣防溺協會秘書長 徐煒杰：「伊（白水區）佮水無仝款，水是有浮力的，但是因為水內底有足濟空氣的時陣，你欲浮起來是足困難的。因為（閘砂壩）彼个區域，可能會有會滾絞的流，會像洗衫機按呢絞，所以你若一入去彼个流內底，你無一定是通好成功逃脫出這个所在。」
台灣的水域真濟種，無仝地形的水域攏有無仝風險，專家表示，干焦禁止民眾落水無法度阻止悲劇發生，判斷水域環境敢有安全的智識是真重要，專家呼籲應當列入學校教育內底，嘛建議民眾若是去參加商業的水域活動，也著看敢有及格的救生員和教練，較有安全保障。
記者 呂尚儒 莊浚佑 臺北報導